Hallo Julle!

Ek hoop dit gaan goed met almal en alles en dat julle darem al teen hierdie tyd my nuwe cd, Gister en Vandag,

aageskaf het ! Dankie ook vir almal se terugvoer oor jou gunsteling song op die album. En dan was ons kompetisie wenners ook bekendgemaak en word 'n paar mense lekker bederf met 'n vakansie en produkte van my borge. Baie geluk aan Madeleine Janse Van Rensburg, Braam Van Zyl en Cecilia Kruger.

Februarie was 'n goeie maand. Behalwe dat 'n simpel vrou van Bloemfontein goed op my persoonlike facebook geskryf het nadat ons haar laat afdank het oor onbevoegdheid en liegstories sal Februarie uitstaan in die Geskiedenis boeke toe ons die ANC trompop geloop het met 'n sosiale media protesaksie !

Baie van julle het deelgeneem ... baie dankie! Dus nou al 'n geruime tyd dat die ANC ons geskiedenis verdraai en my en jou as Afrikaner skurke wil uitbeeld, ek sidder om te dink wat word die kinders op skool in die Townships geleer oor Afrikaners. En dis waar ons veldtog begin het. Ek en Steve en Adam Tas en verteenwoordigers van Afriforum is na verskeie Ambassades om 'n memorandum te oorhandig tesame met die boek, Ons was daar, wat handel oor die destydse grensoorlog. Ons het gestap en die mense het by die duisende saamgestap op twitter en facebook, oorsee het dit gegons oor ons en die boodskappe van ondersteuning het ingestroom. Ons was selfs 'n paar keer die mees gewildste sosiale netwerk onderwerp! Hierdie was 'n groot sukses en 'n eerste in die geskiedenis van Suid-Afrika. BAIE DANKIE VIR JOU DEELNAME !! My arme Ma is net bekommerd elke keer as sy my op die Nuus sien betoog dat die ANC op ons gaan skiet ... ten minste dood ek dan vir goeie saak ! Ek grap nou maar dit bly maar in 'n ou se agterkop en dinge het 'n jaar of twee gelede amper warm geraak toe ons na die ANC hoofkantoor toe was oor Plaasmoorde ... toe WOU hulle op ons skiet !

Ek het wonderlike shows gehad die afgelope tyd en daar lê nog soveel voor ... Die Beeld Kinderfondskonsert was baie lekker en is dit 'n voorreg net soos met hulle Kerskonsert om te kon help. Ons gaan binnekort ook by die Loeriekinderhuis 'n draai maak ... ek hoop julle kom kuier saam ! Die datum sal op my facebook fanpage gepubliseer word later. En spaar nou al 'n paar rand vir hulle Kersboom Desember.

Geniet solank die laaste van die Somer !! Oor Rugby sal ons maar later praat voor ek te gou grootbek raak want dit het my mos verlede jaar duur te staan gekom ... ek is net baie bly Heineke Meyer is die nuwe coach! Oor die Bulle en hulle nuwe truie ?? Kom ons laat dit vir later ... hê-hê!!

Groente en God Bless!

Hallo Almal,

'n BAIE BAIE voorspoedige en great jaar vir jou! Hopelik het jy 'n lekker vakansie gehad en is dinge weer terug na normaal in jou lewe!

Ek het vreeslik lekker gekuier in Botswana met so 'n "mini" Safari soos die ouens van oorsee dit noem. Ek het gaan draai tot bo in Savuti, deur die Moremi en terug gekom deur die Sentraal Kalahari.  Dit was ongelooflik en het ek vir die eerste keer in my lewe gesien hoe 'n Leeu 'n Gemsbok reg voor my vang. Elke aand het ek 'n vuurtjie aangesteek en 'n ietsie gebraai, vêr weg van die Stadsgeraas en dinge. Gewoonlik het ek Januarie maande oorsee gaan kuier totdat ek "Afrika" ontdek het ........ en dit is waarlik goed vir die siel en net die regte medisyne om 'n jaar van vooraf reg en vol moed te begin. Nou begin ek wonder of Malawië ..... lyk mooi. Was jy al daar ? (Terloops was vreeslik om te sien met my terugkoms die ou van Modimole wat sy vrou laat verkrag het en sy stiefseun geskiet het. Tragies)

Desember het ek  ook baie van julle by die Kalahari raakgeloop ...... en ek het self ingespring met tye en gehelp maar ek dink nie ek is die beste waiter wat daar is nie ....... my vingers was pal in die chips as ek 'n bord moes aangee!! Gelukkig het ek niks borde gebreek nie.

Dankie ook vir almal se mooi boodskappe oor Noot vir Noot en Opskop saam met Wicus vd Merwe ..... laasgenoemde kan ek ongelukkig nie kyk nie en het ek vergeet om dit te pvr. Sal maar 'n kopie by hulle kry.

Ek hoop jy het jou bucket list reg vir 2012.

Groente,

Gerrie